Адам тек біліммен тірі,
Тек білім ғасырды қозғайды!
"Қолымнан келмейді" деп айтпа.
Білімге жаныңмен ұмтыл.
(А. Құнанбайұлы)180 жыл
24 қыркүйек күні Орталық аудандық кітапханада ұлы ақын, ойшыл, философ Абай Құнанбайұлының 180 жылдығына арналған IV республикалық «Kіtap time» фестивалі өтті.
Мерекелік шараны домбыраның нәзік үні мен жүрекке жеткен әуезді ән ашып, қазақ халқының рухани мұрасына деген құрметке толы ерекше атмосфера сыйлады.
Жиналғандарға жылы лебізін білдірген жүргізуші сөз сөйлеп, көпшілік ықыласына бөленді. Сахнаға «Абайдың» өзі шыққандай әсер қалдырған театрландырылған көрініс ерекше қошеметке ие болып, ұлы ойшылдың өлмес жыр жолдары көрермен жүрегін тербеді.
Жас оқырмандар ақынның өлеңдерін мәнерлеп оқып, қатысушылардың орындауындағы әуезді әндер залды әсемдік пен үйлесімге бөледі.
Фестиваль мәдениет үйі қызметкерлерімен бірлесе жоғары деңгейде ұйымдастырылып, әдебиетті сүйетіндер мен қазақ мәдениетінің жанашырларын тоғыстырды. Оның басты мақсаты – оқуға қызығушылықты оятып, кітапқа құрмет сезімін қалыптастыру, жас ұрпақты Абайдың бай рухани мұрасымен сусындату – толықтай орындалды.
Мерекенің соңғы бөлімінде барлық жас қатысушылар шығармашылық үлестері үшін алғыс ретінде дипломдармен және естелік сыйлықтармен марапатталды.
